''Kariega, Ecca, Bathurst in die OosKaap''
Die OosKaap bly maar een van die mees besonderse dele van ons land. Groot variasie van natuur en topografie. Ek gaan gereeld soontoe en elke jaar word ek verras met iets nuuts.
Tussen Alexandria en Boesmansriviermond is 'n afdraai wat gemerk is 'Ngciyo' (S33d39'12" E26d32'11"E). Dit is 'n kort grondpad wat plaaslik bekend staan as die "Poor man's Game Drive". Dit loop vanaf die R72 na 'n teerpad (gemerk 343) tussen Kenton-on-Sea en Salem.
Ngciyo
Weerskante van die pad is hoe" heinings van 'n hele paar wildplase. Dit is 'n openbare pad, in baie goeie toestand en mens sien baie wild so al met die pad langs.
Ghio wetlands reservaat
'n Trop blouwildebeeste teenaan die pad het aan die hardloop geraak toe ek met my helder blou baadjie naderstaan vir 'n foto.
In die verte het 'n klompie elande, springbokke en volstruise rustig gewei.
Die grondpad slinger sowat 12km totdat dit by Swindon by 'n teerpad aansluit. Hier het ons links gedraai in die rigting van Salem.
Oral was daar wild te sien. Baie blesbokke en blouwildebeeste. Ook rooibokke. Die vlakvarke wat gewoonlik daar is, was ongelukkig nerens te sien nie. Ook nie die leeus nie.
Swindon
'n Ent verder by Ocean View het ons gestop om die mooi uitsig te geniet. Hier naby was pynappel lande en ver op die horison die see.
uitsig by Ocean View
In die Mount Pleasant omgewing het ons op kameelperde en sebras afgekom. Dit was baie mooi, maar vir my baie vreemd omdat dit 'ingevoerde' diere is in die OosKaap. My kamera het hard probeer, maar die kameelperde was bietjie ver vir 'n goeie foto, al het ek die kamera styf teen 'n paal vasgedruk.
Naby Mount Pleasant
Die zebra heel regs het ons 'soooooo'gestaan en kyk en duidelik gewys wat hy van ons dink!
Zebras
Salem is 'n baie klein plekkie (ongeveer drie geboue). Maar die winkel is SALEM PLACE (nogal!) en die enkele telefoonpaal laat mens dink hierdie Salem-plek is 'n kommunikasie-sentrum.
Salem Place (nogal!)
Volgende stop was die Setlaarsmonument, met die dorp uitgestrek daar onder.
Grahamstad vista
Op die Rhodes kampus staan hierdie fiets-struktuur. Nogal baie indrukwekkend! Ek wonder of dit beter sou lyk met enjins in die fietse...
Fietsbeeld by Rhodes
Grahamstad se Katedraal en die stadsaal se toring (links agter) van sandsteen bly van die mooiste landmerke in die omgewing.
Katedraal
Net vir die afwisseling het ons 'n deel van die Ecca-pas (tussen Grahamstad en Fort Beaufort) gery.
Ecca pas
So halfpad af (33d12'09.86" S 26d 37'08.86" E ) het ons gestop en die ongelooflike vreedsaamheid van die omgewing geniet. Dit is steil en diep af na die kloof daar onder, met die oorkantse helling wat lyk of dit hier naby jou is.
Besondere vreedsaamheid in Ecca
Terug na Grahamstad en toe via Manley Flats na die Pig-n-Whistle in Bathurst vir 'n koffie.
Manley Flats vista
Bathurst
Bathurst is sterk besig om 'n toeriste-aantrekking te word. Baie van die inwoners is kuns-sinnige mense. Van die mense wat ons daar gesien het is so min of meer die moderne weergawe van jare gelede se hippies.
Aantreklikhede vir Toeriste
Die welbekende Trekkermuseum was ongelukkig gesluit. Die vorige aand was daar 'n Bierfees wat glo deur 12000 mense bygewoon is.
Bathurst Trekkermuseum
Daarvandaan na Port Alfred en 'n lekker ete langs die Marina, met bootjies wat tot laataand heen-en-weer vaar.
Port Alfred marina
By die Marina ry mens oor die bekende staal boogbrug, helder verlig vir Kersfees.
Port Alfred brug
Ai, hoe wens ek dis steeds vakansie....